fbpx
aA001

“以我相睇幾十次的經驗,我發覺完全唔係,幾靚幾筍都有齊…"

好多人或者以為去得相睇公司的人都係毒男毒女,唔慌有靚女筍盤,去黎都無謂。但以我相睇幾十次的經驗,我發覺完全唔係,幾靚幾筍都有齊,係睇你地有無緣成為一對,呢D機會係咪你咁解。

我參加嗰間公司可以睇到對方的資料,例如年齡、工作、興趣與及最重要的相片。雖然有女士同我講因為睇過我寫的文字才約我見面,但查實佢之後又會話,係睇到我幅相覺得合眼緣先約。我唔算靚仔,只不過係曾經申請過D工作咁好彩中介公司又做埋影相,咁就安排我著西裝影左一次個樣算係見得人的相。呢幅相我放過上FB,有朋友話要向海關舉報,話我幅相同事實不乎,犯左不良商品說明條例。。。好在海關話我唔係做生意,如果我用呢幅相做鴨先要拉。。。

我38歲,通常30幾的女士我先約,因為覺得咁先溝通到。老實講,有D好靚,靚到可以做明星。我見過一個細我一年的OL,兼職教跳舞,眼大大靚到痹,個樣點睇都唔似年紀同我參唔多,話係20幾都仲有人信。老實講,如果佢後生時參加香港小姐,唔入三甲我切出黎煲湯派街坊都仲得。

可惜呢位女士曾經同我講「唔係唔考慮你,只係暫時唔考慮感情問題」,之後都食過一兩次飯。佢表演跳舞我都有去睇。。。無幾耐就見佢面書D相係攬住條友影。。。又話唔考慮感情問題?係唔考慮同我的感情問題至卦。。。呢個故事遲D會詳細寫出。。。

另一個教瑜伽的,好似係拍過廣告。個樣又係勁靚,身裁又好,可惜食完飯之後,What’s app兩三日就無覆。。。仲有一個大我半年,個樣又係勁靚,又係睇落唔似咁的年紀,佢話去酒吧之類,都仲有人要查佢身份證。。。。當然,我都做過服務性行業,查人身份證未必係懷疑你未夠18,只係懷疑你有無48。。。食過兩次飯,之後本來約左食飯但話病唔出黎,之後就無再聯絡了。。只因平時What’s app都無乜反應,約左唔出黎又無話約下次,唔岩就無謂再打擾人。

講番男士。有相睇過的護士同我講,個database入面有醫生係度約佢,仲至少有三個咁多。係咪真醫生呢?佢話至少認得一個係真,因為呢個醫生好多年前追過佢,結過婚,係隔左好多年無聯絡咁解。至於呢位護士本身都係靚女,只不過係結婚過已有小朋友,呢位護士對我的影響好深,簡直係改變左我人生觀同如何看侍兩性關係的關鍵人物。我不但以為自己好快會娶老婆,仲會即刻有埋小朋友做老豆。當然,又一次這些機會不是我的。

另外有女士話,相睇的男士也有唔少筍盤,工程師、IT人甚至公務員都有,有個仲俾過幾個男士相我睇(雖然我覺得好唔道德,但我又好很有興趣睇),都幾靚仔喎,頂你,我算樣係衰嗰班。唔怪得俾我睇,就好似玩showhand咁,明顯係想大走我,查實我唔駛大都走。

所以話,相睇一樣有靚女筍盤,係你去唔去把握咁解,有一種幸福叫主動。

然而相睇的人係咩心態呢?港女多公主病又有無呢?又要遲下先話你知了!


SIGN INTO YOUR ACCOUNT

 
×
FORGOT YOUR DETAILS?
×

Go up