fbpx
40love

“總有D人識貨,知道女人同酒一樣,年份越長越香醇,越有味道,越值錢…"

天王城城50歲嗒27歲女模特兒,全城瘋狂討論男人無論任何年紀,都只愛20幾歲靚女的言論,令一眾年紀漸大甚至已40歲的女士自信心如樓市一樣海嘯式下降,實在令小弟看不過眼,因為小弟相信愛情無分學歷、文化修養、種族、年紀甚至性別。。。。

為了鼓勵更多人特別是接近40歲女士努力追求自己的幸福,貫徹「有一種幸福叫主動」的精神,我決定公開幾位曾與我相睇,接近或超過40的女士成功找到另一半的故事,以說明年齡絕非問題,主動與否才是問題。

在「盛女愛作戰」中,已屆39歲的F字頭女士話想搵細自己5年到大自己5年的男士做伴侶,俾鑽石媒人Mei Ling鬧不設實際,皆因幾多歲的男人,都愛後生女,而且女士到了36已屬高齡產婦,不利生產下一代,因此36至40幾的女士最大鑊,因為參唔多年紀到接近50歲的男人仲可能有得生,至多會選30頭的女士,因為仲想要小朋友。到50歲過外的男士,已無得生,又只會選擇50過外的女士,溝通好D,因此39歲的F想搵細自己5年到大自己5年的男士做伴侶,即係唔駛搵,可以收皮矣。

鑽石媒人開辦婚姻介紹公司,有咁多年經驗,自有其道理,仲好明顯係有數據支持她的說法。但我遇到幾位40歲女士(AV稱為40路)的遭遇,卻有另一番景象,全部都搵到佢的另一與與幸福。

只係呢D幸福唔係我俾佢地的,這些機會又一次唔係我的,你都咪話唔傷心。

個案一:土地不足拆散良緣
與一個39歲的女士相睇,老實講佢仲係幾靚,個樣仲有D似某屆香港小姐季軍林莉,都唔係太覺39歲。嗰晚間餐廳係好嘈,有班鬼佬開party唔知慶祝乜,V嘩鬼叫成晚,嘈到我聽唔到林莉講野,要哄塊面好埋好埋先聽到,成個幾鐘就幾乎面貼面咁講野,講到好無癮,食完即刻埋單走人。

林莉都同意,間餐廳好嘈傾唔到,但轉地方傾佢又唔肯,間餐廳係尖沙咀佢住元朗,話太夜返屋企唔好。

之後我有WS APP過俾佢,問佢星期日有乜活動,佢話約左人喎。。。之後就無聯絡lu。。。

我一直覺得呢單野係土地不足問題,一段大好良緣就咁無左lu。。。

大半年之後,我無意間發意她的facebook,見到佢個status係訂婚。。。

在此祝福她與她的另一半,幸福快樂,不會因為土地問題而出現任何問題。。。

個案二:「我對你係有感覺的。。。」
「我對你係有感覺的。。。」呢句話係出自一位41歲的女士的WS APP對話中,我唔知係真定假,惟有選擇相信,畢竟呢亭機會絕無僅有,當真會好過D。

佢係做普通文職,喜歡做運動,身型好瘦,個樣與年齡相若。唔知真定假,佢話一直有20幾歲的男士追佢,以前有後生同事話勁鍾意佢仲送花俾佢,追到佢瘦個隻,但由於年齡問題拒絕左呢塊小鮮肉;又話係相睇公司好多未夠30歲的男士要求與他見面,她都一一拒絕了。

和我相睇後,佢問過我係咪年紀大就無機會,我一直鼓勵佢,亦有食過幾次飯。食飯傾談其間彼此發現大家都有共同嗜好,就係懷舊,連以前的漫畫同劇集都有共同口味,一傾就幾個鐘。響大時代未翻播前,已傾過話大家最鍾意的劇集就係呢套,仲約埋一齊睇,但諗唔到咩地方合適。最後諗到去網吧搵兩個連位黎睇,百零蚊可以坐幾個鐘,雖然全場最老就係我地兩個。。。網吧越夜越嘈,但耳筒只有一個,我仲買定一個出聲的分插,可以兩個都戴住耳筒黎睇。之前佢已經問過我點解WS APP覆得咁短但出黎咁多野講,係咪唔鍾意用WS APP?後來有個幾星期無約,佢WS APP過俾我話「我地仲約唔約?我對你係有感覺的。。。,睇下有無機會發展?」

可惜我覺得同佢某方面係好夾,但另外一D方面又唔係太夾,做朋友可以的,但再發展未必得,就覆左佢話做朋友算。
無幾耐(真係無幾耐,好似個零月到)佢就係Facebook宣佈搵到真愛,條友個樣係有D似我,係懷舊討論區識的。。。佢要仲要一去齊旅行好似成兩三個月,十足預渡蜜月咁款。

我有短訊佢恭喜佢,佢話要多謝我,因為係我介紹佢加入呢個懷舊討論區,佢先識到呢個男朋友,仲提醒我唔好Hea覆人 WS APP,唔係好容易食蕉,因為女士會認識Hea覆人 WS APP即係唔重視or無機會。
我明明記得第二次食飯時,佢已經話係呢個懷舊討論區浦左好耐,點解無端端又會變左係我介紹佢加入,仲好似做埋佢媒人咁架呢?真箇奇哉怪也,摸不著頭腦。

無論點,佢已經搵到幸福,咁真係太好了。。。只希望佢的另一半唔好Hea覆佢WS APP。

個案三:「我要識左一年先拍拖」
「我要識左一年先拍拖」係出自一位39歲的女士口中。

呢位女士我係交友網站識的,pm一兩次後就交換了facebook同wechat同電話。佢起初好積極,不斷漏我講野,漏到我問佢點解會咁得閒,佢話返工無乜做,但人工又超高,直情係管理級人工。

佢一個人住的,我上過佢屋企兩次。。。

詳情遲我講完女神就會講呢個,總之佢係話要識左一年先拍拖,但我計過我識佢未夠一年,佢已經係Facebook宣佈結婚,仲有埋結婚相。。。識我時明明話無拍拖想搵伴侶,識一年先拍拖但識唔夠一年可以結婚。。。唔怪得好多人唔識都可以上床。。。只係唔同我上咁解。。。

佢好矮好細粒,老公就超高,我估高我半個頭以上。。。

阿媽話,呢D叫電燈柱掛老鼠箱。。。

既然已成為人妻,我也只能祝福他和條電燈柱幸福快樂。

個案四:時光倒流二十年
仲有一位係39歲的專業人士,起樓個D。老實講我係睇到佢幅相而約佢,因為幅相好正,好吸引。但係餐廳見佢坐低時,我直頭想問佢係咪坐錯位,我唔係約你,望真D先知原來係佢,幅相後生左20年。。。

食完飯我送佢返屋企時,我衰衰咁問佢幅相幾時影,係咪好耐,佢話唔係,早幾個星期影。我話你搵邊個攝影師,係咪高手。。。佢話係化粧班化完後影的,咁個化粧師真係無得頂。。。

佢話好多老友睇完幅相都話佢索,確實係。。。但無幾耐見佢係相睇公司的網頁換左相,換左D同實際外貌相乎的相。。。

我同佢食過兩次飯,我又去過佢教會睇下。佢亦有同朋友聚會要我教佢地玩一款棋板遊戲兩次,但之後無聯絡lu。。。

又係大半年後,又見佢係facebook宣佈搵到伴侶,好開心。又好奇怪,我梗係覺得條友有D似我,又係肥又係戴眼鏡又係有D似毒男。。。
搵到咪好囉,我都無乜野好講。

所以話,女人40一枝花,愛嗒後生女的男人係多,但總有D人識貨,知道女人同酒一樣,年份越長越香醇,越有味道,越值錢,古語都有芸老婆越老婆可愛,只要佢做左你老婆的話。。。

希望這一篇文章,能鼓勵更多不同年紀的男男女女,努力找尋另一半,有一種幸福叫主動。

女神下集同「我要識左一年先拍拖」詳細版稍後會出,敬請拭目以待。


SIGN INTO YOUR ACCOUNT

 
×
FORGOT YOUR DETAILS?
×

Go up