fbpx
banana

“對方直接拒絕你的理由,真係千奇百怪,乜事都會發生。"

今次主要講同女方相睇左之後,又同女方交往一段,對方直接拒絕你的理由,真係千奇百怪,乜事都會發生。
當然,好多時女士都唔會直接宣之於口,大多係唔肯出來或whatsapp hea覆或者唔覆,咁就即係請你食蕉。

一:政治立場
「我阿媽係藍絲帶,話明我出去相睇識乜人都好,唔可以識黃絲帶,我同你唔可以發展。」葛珮帆議員兼博士,何止區議會選舉政治化,連相睇都政治化呀,唔怪得你輸啦!

二:面書朋友
「你個facebook有咁多靚女friend,你實有好多選擇啦!」下?add左facebook就代表受溝架喇?個個明星政治人物都好多friend,咁佢地咪好很濫交?呢個世界咪個個男人都係肉蒲團的未央生,搞盡天下女?

三:你好花弗
「你同咁多女仔相睇,我覺得你好花弗,所以我唔考慮同你發展!」Come on,我就係個個都唔得先要見多D,你又話我花弗,咁即係想坐係屋企閂埋度門等待艷福的來臨呀?

四:你好多野講
「你太多野講,令我招架唔住,我唔太鍾意男仔多野講!」最好笑係呢位女士過左幾個月同我講拍拖幾星期拖就分手,原因係條友太靜,唔講野。。。。。多野講又唔得唔講又唔得,咁你即係想點?搵隻鸚鵡做你男朋友,你講一句佢回一句最好呀?不如一人小句啦,你小我一句,我會小番你一句!

五:我對你好陌生
「我對你好陌生」,剛剛識你無幾耐,漏你講野又唔講,問你點又話好陌生,阿姐,你對住一個剛剛識的人話好陌生呀?咁即係對住我話我好肥好樣衰,對住乞衣問點解你無錢,簡直廢話。我鬼唔知陌生咩,你都唔肯溝通梗陌生啦。

六:好事近
「我同一位男士相處得好好,好快會一齊!」咁你又黎相睇?你要證實一下呢個係咪你的Mr.right呀?要做實驗搵隻白老鼠啦,你玩我咩!

七:先友後婚
「我要識左一年先拍拖!」大家都挨近四十,仲有幾多個一年呀?我見你一年唔夠係facebook度宣佈結婚喎,拍拖要識一年,原來結婚唔駛一年,我錯了。

八:只看不吃是常識
「我去相睇都只係貪玩,我暫時唔考慮感情問題!」阿姐,你去餐廳食飯叫晒野,原來你只係影相唔食架?搞搞震無幫襯就係你呢亭人。最搞笑係一兩個月唔夠我就見佢係facebook攬住條友影晒相,又話搵到真愛。妖,你講野講漏少少,你唔係唔考慮感情問題,係唔考慮同我的感情問題
之嘛。

九:又係感覺
最多人講的三個理由係「無感覺」、「無感覺」同「無感覺」。感覺係咩呢,我感覺唔到,總之就係無感覺。


SIGN INTO YOUR ACCOUNT

 
×
FORGOT YOUR DETAILS?
×

Go up