fbpx

「你連外母個關都過埋,呢次睇你喇!」

世上除了三串七或三T外,我覺得無野難得過過外母個關,偏偏我連外母個關都過咗,係個女士唔like我,俾蕉我食,真係史可法個細佬屎可(口也)。

是咁的,話說我契媽好鬼關心我,介紹女仔我識,係佢的親戚。

事前係我唔知的,同契媽飲茶,飲飲下契媽俾個手機我睇。

「靚唔靚女,我親戚黎架!」

老實講,個女仔的確係幾靚,但一見到靚女我除了兩眼發光外,仲記得這些機會不是我的。

「契媽,咁靚女唔駛預我喇,我又肥又醜又無銀,靚女點會吼我!」我話的。

「你人品好嘛,睇下得唔得啦,佢阿媽黎緊飲茶,一齊傾下丫!」契媽大聲到連門口收銀都聽到,伙記仲醒目到問我地係咪加位,喂你地夾埋架?

吓?見佢阿媽?連位女士都未見過就見家長?契媽你都真係活在廿二世紀,做嘢快過光速,我當堂o晒咀。。。

無幾耐,契媽親戚黎到,見到我唔夠三秒,同樣地拿左手機出黎,俾同一個女仔相我睇。。。又係問我靚唔靚女。。。。

呢世人我都唔識講好說話哄人,特別是女人。我阿媽一日到黑黑晒面對住我,其他女士更加睬都唔睬我,唔係我駛乜搞到成38歲都溝唔到女。。。

但唔知整乜,我當時居然講錯左一句說話,就令到阿「未來外母」鬼咁鍾意我,個樣冧到痹,外母見女婿,原來真係會口水滴滴涕,幾乎即刻想我娶佢個女做老婆咁滯。。。

「嘩,伯母,真係有其母必有其女,阿女同你一樣咁靚」

我真係未見過有女人開心得咁緊要,上次我見個女律師打贏官司分咗離婚老公幾億,個樣都無咁開心。。。睇怕阿「未來外母」最開心個刻除左佢初戀同出嫁個陣之外,就係呢刻。。。

「埋單去見下我個女丫!」阿「未來外母」話,又係大聲到連門口收銀都見到,有伙記仲即刻幫我拿起張單去埋,我連銀包都未拎出黎,阿「未來外母」已經拿晒袋起身要行。。。

當時係平日上晝十一點幾,我係自由工你哋退左休就話咁得閒,你個女返緊工點見呀?阿「未來外母」?

原來阿「未來外母」係搞生意,間公司就係飲茶地方附近,行兩三條街就到。佢個女就係公司幫手,換句話講阿「未來外母」係老闆,隨時放人都仲得。

臨找數時,阿「未來外母」仲要話佢個女好恨嫁,成日話要搵人閃婚,唔好阻止佢咁話。但我問阿女咁靚,無理由無人追。

阿「未來外母」話佢個女的確好多人追,但未拍過拖(下?唔係掛!),「有人拿住紮花係樓下等佢,佢都唔制,成三十二歲都未拍過一次拖,真係架,但而家好鬼恨嫁,去親人哋婚禮都一定搶花球,搶到就話可以就快啲嫁,但又無男朋友喎,點嫁喎?你去見下佢啦!」

當時諗,又靚女又未拍過拖?唔係咁益我掛,上天終於開眼,終於都眷顧我喇,Thanks god!

行去舖頭途中,契媽同阿「未來外母」不斷教我做人道理,「嗱,少年夫婦老來伴,係人都要有個伴侶架,後生就講愛情,到我地呢D年紀,同老公仲邊有愛情,得感情之嘛,最緊要有個伴,大家夾到咪得囉,你就下我我就下你,好快就一世架喇!」搞到我以為佢個女實嫁梗我咁滯。

行到公司,我先知原來檔嘢好大間,佔地面積大,賣乜唔好講喇,總之唔係平野,係服務同物品都係價錢任佢開個隻,如果有錢人幫襯,真係一次賺一百幾十皮閒閒地,肯肯定投資唔少野。。。

呢個時候,阿「未來外母」已經忘晒形,我估問佢乜都答,我問佢檔野投資係咪好大,佢話過千萬。。。。

過千萬投資喎。。。即係阿「未來外母」分分鐘有幾千萬甚至過億身家。。。嘩,大佬,靚女加未拍過拖仲要咁疊水,呢次真係錢銀女人一次過番晒嚟。。。。我呢世人都未試過對前景咁有希望。。。

上到去,卒之見到佢個女。老實講無啲相咁靚,而且塊面有少少殘,無乜護膚打理嗰隻。。。。但整體都算係靚女一個。見到我,係咁咦楂個靶交換咗咭片,就話有嘢做要番入去。。。。

原來上天對我的態度,一直都無改變,機會仍然不是我的。。。

落番一樓,契媽同阿「未來外母」不斷問我點點點。。。我話「點啫,你哋睇到架啦,睬都都睬吓我,禮貌式招呼幾句都無,仲有乜點」。。。

但契媽同阿「未來外母」仍然唔死心,仲話實得,無問題。

點無問題法?

如是者我離開舖頭去做嘢,契媽what’s app俾我,「你連外母嗰關都過埋,呢次睇你喇!」

阿契媽,條女嗰關未過噃!

下午,契媽又再what’s app俾我,話阿「未來外母」要約我下星期一去燒嘢食,原因係阿「未來外父」生日,要一家人慶祝,佢個女都會到,唔出席就同我脫離契母子關係。。。。

咁即係有人已當我係一家人,怕未。

有得食我梗係去,但去到又發生咩事呢?

遲啲話你知。


SIGN INTO YOUR ACCOUNT

 
×
FORGOT YOUR DETAILS?
×

Go up